Hautatutakoak NEIKERen Animalien Zientzia Sailean garatuko du doktorego-tesia, behien paratuberkulosiaren detekzio goiztiarra eta gaixotasunen aurkako erresistentzia genetikoa hobetzeko ikerketa-proiektu baten barruan.

NEIKERek Animalia Zientzia Sailean doktoratu aurreko ikertzaile bat hartzeko deialdia egin du. Ikertzaileak doktorego-tesia immunogenetikaren ikerketa-lerroaren barruan garatuko du. Aukera izango du bikaintasun-ingurune zientifikoan sartzeko; horrez gain, abangoardiako instalazioak erabilgarri izango ditu, eta berrikuntzan, jakintzaren transferentzian eta lanbide-garapenean engaiatutako diziplina anitzeko lantaldearen laguntza izango du.

Ikerketa proiektu honen barruan dago: EARLYPTB – «PCR digitala eta karakterizazio genetikoa, transkriptomikoa, metatranskriptomikoa eta epigenetikoa paratuberkulosiaren detekzio goiztiarra eta harekiko erresistentzia genetikoa hobetzeko» (PID2025-168088OR-C21). Proiektua hautatu berri dute Zientzia eta Berrikuntza Ministerioaren Jakintza Sortzeko Proiektuen 2025eko deialdiaren barruko finantzaketa eskuratzeko.

Behien paratuberkulosiaren aurkako borrokan aurrera egiteko ikerketa

Doktore-lanaren helburua izango da behien paratuberkulosiaren detekzio goiztiarra hobetzea, eta gaixotasun horrekiko erresistentzia natural handiagoa duten animalien identifikazioan aurreratzea. Hartarako, teknologia diagnostiko berritzaileak eta tresna multiomikoak uztartuko dira, infekzioari lotutako mekanismo biologikoetan sakontzeko.

Proiektuaren azken helburua da albaitariei eta abeltzaintzaren sektoreari tresna berriak ematea, adin goiztiarrean, bai animalia infektatuak bai Mycobacterium avium azpiespezieko paratuberkulosiaren aurkako erresistentzia handiena duten animaliak identifikatzeko. Bakterio hori da, hain zuzen ere, gaixotasuna sortzen duen agentea.

Zeregin nagusiak

Kontratatuak ikerketaren fase guztietan parte-hartze aktiboa izango du, honako hauek barne hartuta:

• Proiektuarekin lotutako lan esperimentala garatzea.
• Datu zientifikoak sortzea, aztertzea eta interpretatzea.
• Zientzia-argitalpenak lantzea eta ikertaldearen emaitzei ekarpena egitea.
• Emaitzak Estatuko eta nazioarteko mintegi eta biltzarretan aurkeztea.
• Zientzia-bileretan eta elkarlaneko jardueretan parte hartzea.
• Estatuko eta nazioarteko zentroetan ikerketa-egonaldiak egitea prestakuntza eta proiektuaren garapena indartzeko.

Profila

Deialdia zuzenduta dago biozientziekin lotutako diziplinetako titulua dutenei. Besteak beste, honako hauetan:

• Genetika
• Biologia
• Bioteknologia
• Albaitaritza
• Biokimika
• Agronomia
• Ingurumen Zientziak
• Farmazia
• Elikagaien Zientzia eta Teknologia
• Biologia Molekularra
• Kimika
• Antzeko bestelako tituluak

Hautagaiek, kontratua formalizatzeko unean, doktorego-programa batean onartuta edo matrikulatuta daudela egiaztatu beharko dute, eta ordurako ezin dute doktorego-titulurik izan.

Halaber, Europar Batasuneko estatu kide bateko nazionalitatea eduki beharko dute, edo Espainiako legezko bizilekua eta lan-baimena eduki.

Merezimendu baloragarriak

Bereziki positibotzat hartuko dira:

• Laborategiko aldez aurretiko eskarmentua immunologiako, mikrobiologiako eta biologia molekularreko tekniketan.
• Estatistika- eta bioinformatika-ezagutzak.
• B2ren baliokideko ingeles-maila eta gaztelania jakitea.
• Ikerketa-proiektuetan, zientzia-argitalpenetan eta biltzarretan parte hartu izana.

Kontratazioaren baldintzak

Eskaintzak ikerketa-prestakuntza eta lanbide-garapena laguntzeko baldintzak jasotzen ditu:

• Kontratuaren iraupena: 4 urte.
• Urteko soldata gordina: 27.227,24 euro.
• 7.000 eurora arteko laguntza gehigarria, honako honetarako:
  • I+Gko beste zentro batzuetako ikerketa-egonaldiak egiteko.
  • Doktorego-programaren matrikula-tasak lau urtean ordaintzeko.
• Lanaldia: 35,75 ordu astean.
• Oporrak: 29 egun urtean.
• Baimenak: Norberaren aukerako 6 egun.
• Etengabeko prestakuntza eta lanbide-hazkunderako aukerak.

Kontratua 2027ko urtarrilean hastea aurreikusita dago.

Hautagaitzak aurkeztea

Eskaerak online bakarrik aurkeztuko dira, NEIKERen webgunean, azaldutako merezimenduen eta baldintzen egiaztagiri guztiak erantsita.

Hautagaitzak ebaluatzeko orduan honako hauek hartuko dira kontuan: ibilbide akademiko eta zientifiko-teknikoa, aldez aurretiko eskarmentua, ikerketa-proiekturako egokitzapena eta lanbide-garapenerako ahalmena. Aurrez hautatutakoek elkarrizketa baterako deia jasoko dute, aurrez aurre edo online egiteko.

Deialdi honen bidez, NEIKERek berretsi egiten du, batetik, talentu ikertzaile berria prestatzearen aldeko apustua, eta bestetik, animalien osasuna eta abeltzaintzaren sektorearen jasangarritasuna hobetzen laguntzen duten irtenbide berritzaileak garatzearen aldeko apustua.