Interesatzen zaizu animalien osasunari, klima-aldaketari eta gaixotasun emergenteei buruzko ikerketa? NEIKER ikertzeko bokazioa duen pertsona bat bilatzen ari da, Euskadin bektore bidez kutsatutako gaixotasunen zaintzan eta prebentzioan zentratutako doktore-tesi bat egin nahi duena.

Heldu diren lau urteetan, epidemiologia, animalien osasuna, osasun publikoa, ekologia eta datuen zientzia integratzen dituen proiektu batean lan egingo duzu, eltxoei eta akainei lotutako arriskuak aurreikusteko. Ikerketa One Health ikuspegiaren arabera egingo da, hau da, animalien, gizakien eta ingurumenaren osasuna integratuta, etorkizuneko osasun-erronka handiei aurre egiteko.

Zein izango da zure lana?

Landa-laneko, laborategiko eta datuen analisi aurreratuko jardueretan parte hartuko duzu. Besteak beste, zeregin hauetan lagunduko duzu:

• Eltxoen eta akainen populazioen jarraipena, Euskadiko zenbait ekosistematan.
• Birus emergenteen detekzio goiztiarra (besteak beste, Mendebaldeko Niloko birusa, Usutu birusa eta Krimea-Kongoko sukar hemorragikoaren birusa).
• Akainek kutsatzen dituzten eta aziendari erasaten dioten gaixotasunak aztertzea, barne hartuta Anaplasma, Babesia eta Theileria generoek eragindako infekzioak.
• Koinfekzioen analisi klinikoa eta molekularra ekoizpen-animalietan.
• Klimari, ingurumenari, epidemiologiari eta osasunari buruzko informazioa bateratzea, arrisku handieneko eremuak eta sasoiak identifikatzeko.
• Zaintza- eta prebentzio-sistemak hobetzen laguntzen duten mapa prediktiboak eta tresnak garatzea.

Zer eskaintzen dizugu?

• Doktoratu aurreko 4 urteko kontratu bat, doktore-tesi bat egiteko.
• NEIKERen Parasitologia eta Bektoreen lantaldean sartzea, Derion (Bizkaia).
• Prestakuntza espezializatua epidemiologiaren, animalien osasunaren, bektore-ekologiaren, diagnostiko molekularraren eta modelizazio espazialaren alorretan.
• Gaixotasun emergenteen eta zoonosien zaintzarekin lotutako proiektu estrategikoetan parte hartzea.
• Bektoreak atzitzeko eta aztertzeko ekipamendua, biologia molekularreko tresnak eta datu geoespazialak aztertzeko teknologiak erabiltzeko aukera.
• Administrazio publikoentzat, albaitaritzako profesionalentzat eta abeltzaintza-sektorearentzat ezagutza erabilgarria sortzeko aukera.
• Zientzia-argitalpenetan, nazioarteko biltzarretan eta ezagutza transferitzeko jardueretan parte hartzea.

Bilatzen ari garen profila

Biologiako, Bioteknologiako, Ingurumen Zientzietako, Agronomiako, Farmaziako, Giza Nutrizioko, Elikagaien Teknologiako, Baso Ingeniaritzako, Matematikako edo biozientziekin lotutako beste titulazio batzuetako unibertsitate-ikasketak amaitu berri dituzten edo amaitzear dituzten pertsonak.

Informazio eta eskaera gehiago

Laster…