SLOWAIR

Helburu nagusia

Hazkunde moteleko oilaskoen osasunarekin, ongizatearekin —estres termikoa barne— eta ekoizpen-efizientziarekin lotutako ingurumen-iragarleak garatzea, hala abeletxean nola hiltegian, ekoizpen-baldintzak are hobeagoak izan daitezen.

Helburu espezifikoak

• Hazkunde moteleko oilaskoen nabeetan ingurumen-baldintzak etengabe monitorizatzea ekoizpen-ziklo osoetan; haien osasun eta ongizatearekin (estres termikoa barne) lotutako adierazleak ebaluatzea produkzioaren aldi garrantzitsuetan, eta hiltegiko ekoizpen-efizientzia zehaztea.
• Ingurumen-iragarle berriak garatzea, oinarri hartuta ekoizpen-nabeetako ingurumen-baldintzen etengabeko monitorizazioa. Iragarleak lotuta egongo dira oilaskoek ekoizpen-zikloaren une garrantzitsuetan duten osasun eta ongizatearekin, bai eta hiltegiko ekoizpen-efizientziarekin ere.
• Oilaskoen osasuna eta ongizatea aurreikustea ekoizpen-zikloaren une garrantzitsuetan, baita haien ekoizpen-efizientzia ere, ingurumen-iragarle berrietan oinarrituta.
• Kuantifikatzea ingurumen-iragarle berriek zer neurritan ematen duten informazio handiagoa (osasuna, ongizatea eta abeletxeko nahiz hiltegiko ekoizpen-efizientzia) abeletxeko ongizateari buruzko ebaluazioetan egindako neurri puntualek baino.

Espero diren emaitzak

• Etengabeko neurrietan oinarritutako ingurumen-iragarleak identifikatzea espero dugu, eta haien bidez, neurri puntualen aldean, hobeki antzematea ingurumenaren eta hegaztien ongizatearen nahiz produktibitatearen arteko interakzioen izaera dinamikoa. Espero dugu ezagutza hori guztia ereduetan txertatzea, hegaztien abeletxeko ongizatea, eta horrekin batera, baita hiltegiko ekoizpen-efizientzia ere, aurreikusteko.
• Halaber, espero dugu garatutako iragarleak eta ereduak lagungarriak izatea, datuen bitartez, hazkunde moteleko oilaskoen ekoizleen kudeaketa-erabakiak hartzeko, era horretan ekoizpen-nabeetako ingurumen-baldintzak hobeki kontrola ditzaten. Hori horrela, aukera izango dute gas kaltegarrien kontzentrazioen eta/edo estres termikoaren ondorioz izan litezkeen arazoei aurre egiteko, eta horrek ongizatea, efizientzia eta produktibitatea eraginkortasunez hobetzea ekarriko du.
• Espero dugu ingurumen-iragarle berriak garatzea, oraingo ebaluazio-protokoloetan eta ziurtatzeko programetan integra daitezen, eta ongizateari buruzko ebaluazioak zehatzagoak izateko eta gizarteak animalien ekoizpen-katean duen konfiantza handitzen eta epe luzeko jasangarritasuna bermatzen laguntzeko.