• Berrikuntza gisa, aurten, patataz gain, 250 kilo kalabaza ere eman dira, eta aurki erremolatxa, batata eta beste tuberkulu batzuk emango dira.

• Ekimenaren bitartez, NEIKERek Euskadiko familia behartsuenekin lankidetzan aritzeko konpromisoa berresten du, eta ekoizpenean sobera dauden elikagaiak aprobetxatzen direla ziurtatzen du.

 

NEIKER zentro teknologiko eta Basque Research and Technology Alliance (BRTA) erakundeko kideak Euskadiko familien elikagai falta arintzeko konpromisoa berretsi du. Guztira, aurten, zentroak 23.000 kilo baino gehiago eman dizkio Arabako Elikagaien Bankuari Arkautiko bere finkatik.

Zehazki, 23.000 kilo patata eman dituzte, eta, berritasun gisa, aurten 250 kilo kalabaza ere banatu dituzte, eta aurki mahaiko erremolatxa, batata eta beste tuberkulu batzuk emango dituzte, NEIKERen eta Euskadiko Elikagaien Bankuaren arteko lankidetza hitzarmenari esker, 1.200 familia baino gehiagori laguntzeko.

Juan Bautista Relloso Barrio NEIKEReko ekipo eta azpiegituren koordinatzaileak eta Daniel Fernandez Arabako Elikagaien Bankuko lehendakariak parte hartu dute aste honetan egin den azken patata sortaren banaketan.

Ekimena zentroaren konpromiso sozialaren barruan kokatzen da, eta 2015ean Euskadiko Elikagaien Bankuarekin ezarritako akordioari esker da posible. Bautistak ziurtatu duenez, “dohaintzarekin, baliabide gutxiago dituzten familien elikadura hobetzen laguntzeaz gain, gure Arkautiko lursaileko ekoizpen esperimentaleko elikagai soberakinak optimizatzea ere bermatzen dugu”.

Jatorria eta barietateak

NEIKERek ikerketa ugari egiten ditu, eta urtero nekazaritzako soberakin ugari sortzen ditu. Patatei dagokienez, soberakinaren zatirik handiena ‘kontrol aurreko’ eta ‘kontrol osteko’ probetatik dator, horien helburua izanik hazien kalitatea bermatzea eta produktuak osasunaren zein nekazaritza eta ekonomiaren arloetako baldintzak betetzen dituela bermatzea.

Prozesu horien ondorioz datoz aurtengo dohaintzan emandako patata barietateak: Kennebec, Monalisa, Jaerla, Agria, Baraka, Red Pointiac, Desire eta Yona, guztiak ere zentroaren ikerketen emaitza.