• Zentro teknologikoak 175 urte bete ditu aurten, eta sari honek bat egin du urteurrenarekin. Izendapenak nekazaritzako elikagaien eta basogintzaren I+G+b arloan egindako ibilbide bikaina aitortzen du.

 

NEIKERek mugarri berri bat lortu du bere mendeurreneko bidean. Aragoi, Nafarroa eta Euskal Herriko Nekazaritza Ingeniarien Elkargo Ofizialak eman dio Ohorezko Elkargokide saria. Elkargokideek joan den abenduko Batzar Nagusian hartu zuten erabaki hori. Izendapen honekin, NEIKERek ikerketan, garapenean eta berrikuntzan duen lidergoa saritu nahi dute. Zentroak sektorearen mesedetan egindako kudeaketa eraginkorra ere azpimarratu dute.

 

175 urteko bikaintasuna I+G+b arloan

Elkargoak NEIKERen ibilbide luzea balioetsi du sari hau emateko. Zentroak 175 urteko historia du. Mende eta erdi honetan, zentroa etengabe moldatu da nekazaritzako elikagaien, basogintzaren eta abeltzaintzaren erronkei erantzuteko. Gaur egun, lehen sektorearen lehiakortasuna eta jasangarritasuna hobetzeko funtsezko eragilea da. Aitortza honek erakundearen garrantzi historikoa nabarmentzen du. Horrez gain, gaur egungo proiektu berritzaileak gidatzeko eta ezagutza zientifiko handia sortzeko duen gaitasuna ere goraipatzen du.

 

Giza taldeari aitortza

Olatz Unamunzaga NEIKEReko zuzendari nagusiak eskerrak eman ditu berria jakitean: “Izendapen hau ohore handia da NEIKEReko kide guztientzat, gaur egungoentzat zein lehengoentzat. Nekazaritza Ingeniarien Elkargo Ofizialak sari hau eman digu gure 175. urteurrenean. Hori da gure sektorearekiko konpromisoari egin dakiokeen aitortzarik onena. Sari honek bultzada ematen digu ilusio berarekin lanean jarraitzeko eta etorkizuneko erronkei irtenbide berritzaileak bilatzeko”.

 

Sari banaketa Zaragozan

Ekitaldi ofiziala datorren maiatzean izango da, Zaragozan. Data hori San Isidro egunarekin, nekazaritza-ingeniarien zaindariaren jaiararekin, bat dator. NEIKERek eskerrak eman dizkie Aragoiko, Nafarroako eta Euskal Herriko Gobernu Batzordeari eta elkargokide guztiei. Izendapen honek profesionalen arteko lankidetza indartzen du. Era berean, zentroaren sorreratik nekazaritzaren garapenean lagundu duten ikertzaile eta teknikari guztien lana balioesten du.