• NEIKER, Basque Food Cluster, AZTI eta Eroski Taldearekin batera, FOODATEUS proiektuan lanean ari da, Euskadin trantsizio digital, berde eta inklusiboa azkartuko duten teknikak ezartzeko

Eusko Jaurlaritzako Elikadura, Landa Garapen, Nekazaritza eta Arrantza Sailaren mendeko NEIKER zentro teknologikoak FOODATEUS proiektuan dihardu, BASQUE FOOD CLUSTERekin, AZTI ikerketa zentroarekin eta Eroski Taldearekin lankidetzan, nekazaritzako elikagaien euskal sektorearen trantsizio digital, berde eta inklusiboa bizkortzeko erabilgarri dauden teknikarik onenak inplementatzeko. Proiektua elikagaien bizi zikloaren analisian zentratuko da, tokiko datu zehatzagoak eta fidagarriagoak erabiliz.

Elikagaien bizi zikloaren analisia funtsezko tresna da, horiek ekoizpen eta kontsumo kate osoan sortzen duten ingurumen inpaktua ulertzeko eta murrizteko. Metodologia horrek etapa bakoitzeko puntu kritikoak identifikatzea ahalbidetzen du –ekoizpena, prozesamendua, garraioa, kontsumoa eta hondakinak–, estrategia jasangarriagoak inplementatu ahal izateko. Egungo testuinguruan klima aldaketaren aurkako borroka lehentasunezkoa izanik, ikuspegi hori aplikatzea funtsezkoa da nekazaritzako elikagaien sektore jasangarriagoarekin eta deskarbonizazio eta ekonomia zirkularreko helburuekin bat datorren sektore baterantz aurrera egiteko.

Elikagaiek eragiten dituzten ingurumen inpaktu nagusien jatorria ezagutzeko, partzuergoak elikadura balio kate osoaren azterketa sakona egingo du, ekoizpen, hornidura fluxu, ontziratze eta kontsumitzeko praktiketan sakonduz.

Informazio hori abiapuntutzat hartuta, ingurumenaren gaineko eragina neurtzeari eta murrizteari lotutako arazoen diagnostikoa egingo da, prozesuaren puntu kritikoak detektatzeko. Proiektuak hobekuntzak ekarri nahi ditu inbentarioko datuak lortzeari, algoritmoen bidez horiek estrapolatzeari eta ingurumen inpaktua kalkulatzeko metodologiak aplikatzeari dagokienez, besteak beste. Horrekin guztiarekin, neurketak hobeak izatea eta, beraz, jasangarritasunari dagokionez, elikadura katea etengabe hobetzen lagunduko duten bide orri seguruagoak sortu ahal izatea espero da.

FOODATEUSen barruan lortutako emaitzak SAFEPACK proiektuan integratuko dira, hau da, ontzi zirkularren garapena bultzatzen duen ekimenean, bizi zikloa ixteko, zero hondakinera iritsi arte.

Proiektua Eusko Jaurlaritzak Euskadiren trantsizio digital, berde eta inklusiboa bizkortzeko egindako apustuaren parte da, Euskadi 20230 Zientzia, Teknologia eta Berrikuntza Planaren bidez. 2030 ZTBP Euskadi digitalagoa, berdeagoa eta inklusiboagoa bilatzen duen estrategia bat da, eta trantsizio hirukoitz batean oinarrituta dago: teknologiko-digitala, energetiko-klimatikoa eta sozial-sanitarioa.