• NEIKER bokazio zientifiko teknologikoak sustatzeko ikastetxe eta eragile sozioekonomikoen Steam Sareko kidea da
• Aste honetan topaketa bat egin da BECen (Barakaldo), eta NEIKEReko hiru ikertzailek parte hartu dute, unibertsitate aurreko ikasleei beren esperientzia helarazteko

Topaketak Eusko Jaurlaritzaren STEAM Estrategien barruan garatzen dira, eta helburua da STEM ikasketak (Science, Technology, Engineering, Mathematics) Euskadiko ikasle guztiei hurbiltzea, batez ere neskei. Estrategia horren barruan, STEAM Sare sarearen zeregina da ikasleen artean Euskadin egunero lan egiten duten enpresa eta zentro teknologikoen praktika profesionalei ezagutza sustatzea.

Guztira 14 ikastetxetako DBHko 4. mailako 800 ikaslek STEM arloko (zientzia, teknologia, ingeniaritza eta matematikak) 90 profesionalen esperientzia ezagutu dute lehen eskutik, horien artean NEIKEReko hiru ikertzaile egonik.

Hezkuntza Sailak antolatutako Steam Sare jardunaldiak Innobasqueren lankidetza dauka, eta Elhuyarrek ere parte hartzen du. DBHko 4. mailako ikasleei zuzendua, topaketa berritzaile bat da, eta helburua da ikasleen artean bokazio zientifiko-teknologikoak sustatzea.

Gaur BECen egin den lanbide orientazioko jardunaldiak oinarrizko bi helburu ditu: batetik, DBHko 4. mailako ikasleei prestakuntza eta lanbidea aukeratzen laguntzea, profesionalekin harreman zuzenean jarrita, STEM lanbideen aukerak erakusteko; eta, bestetik, STEM arloetan bokazioak eta nahiak inspiratzea, batez ere nesken artean.

Hitzordu azkarrak eta aurkezpenak

Ikasleek gaurko jardunaldirako antolatutako bi dinamiketan parte hartu dute, 400 ikasle inguruko bi talde handitan banatuta.

Dinamiketako bat, originalean, hitzordu azkarren formatuan garatu da, BECEKO Luxua aretoan. Ikasleak bost laguneko taldetan banatu dira, eta hamabost minutuko txandatan gonbidatutako profesionalekin partekatu dute mahaia. Denbora horretan, enpresa desberdinetako profesionalek eguneroko lanean zer erronkari egin behar dieten aurre azaldu diete, horien artean: NEIKER, Gestamp, Aernova Aerospace, Arteche, CIC EnergiGUNE, ITP Aero, Tecnalia, Mercedes-Benz, Irizar, Petronor, EHU edo BCAM (Basque Center for Applied Mathematics), beste askoren artean. Halaber, ikasleek planteatutako zalantzei eta galderei erantzun diete. Hamabost minutu horiek amaitzean, profesionalek mahaiz aldatzen zuten, beste ikasle batzuek jardunaldian landutako errealitate profesionalek ezagutzeko aukera izan zezaten. NEIKERen aldetik, ‘hitzordu azkar’ horietan parte hartu dute Ramon Justek, Animalia Osasuneko Departamentuko ikertzaileak, eta Nerea Mandalunizek, Animali Ekoizpeneko Departamentuko ikertzaileak.

Aldi berean, jardunaldian parte hartu duten gainerako ikasleak STEM arloko zenbait profesionalen aurkezpen laburretan izan dira, BECeko auditoriumean, horien artean egonik Amaia Ortiz, NEIKEReko Landare Ekoizpen eta Babeserako Departamentuko arduraduna. Bost minutuko aurkezpenetan, hamar profesionalek beren ibilbide akademiko eta profesionala kontatu dute modu erraz eta atseginean, gaur egun garatzen ari diren lana egiteko dituzten motibazio eta interes pertsonalak azalduz. Atsedenaldiaren ondoren, ikasleek dinamikaz aldatu dute: lehenago hitzordu azkarretan parte hartu dutenak aurkezpenetara joan dira, eta alderantziz.

 STEAM Sare

Bokazio zientifiko-teknologikoak sustatzeko ikastetxeen eta eragile sozioekonomikoen STEAM Sare sareak gaur egin duen jardunaldia 2023-2024 ikasturterako antolatutako jardueren barruan kokatzen da. STEAM Sare jarduerek STEM eremuetan lan egiten duten profesionalekin harremanetan jartzen dituzte ikasleak.

STEAM Euskadi Estrategiaren barruan, STEAM Sare programak ikasleek Euskadin egunero lan egiten duten arlo zientifiko-teknologikoko enpresa eta zentro teknologikoetako praktika profesionalak ezagutu ditzaten sustatzen du, enpresa eta erakunde horien lantokietara bisitak ere hartzen dituzten jarduerekin. Urte akademiko osoan zehar garatutako hainbat jardueraren bidez, STEAM Sare-n parte hartzen duten ikastetxeetako ikasleek zenbait sektoretan –esaterako, energia, automobilgintza, aeroespaziala edo industria– puntakoak diren euskal erakunde edo enpresetako profesionalen benetako esperientziara hurbilduko dira.

2023-2024 ikasturte honetan, STEAM Sare sarean 54 ikastetxek eta 43 erakunde laguntzailek parte hartzen dute (enpresak, unibertsitateak, lanbide heziketako elkarteak, zentro zientifikoak eta teknologikoak). Erakunde laguntzaile horien artean daude, NEIKERez gain, NEIKER, CIE Automotive, Sidenor, EHU, Cikautxo, Danobat Group, Orona, DIPC (Donostia International Physics Center), Iberdrola, Ikerlan edo Mercedes Benz, beste askoren artean.