Albisteak

NEIKEReko bi ikertzaile Stanford-eko Rankingean, munduko zientzialari eraginkorrenen artean

Carlos Garbisu, ingurumen mikrobiologian aditua, eta Ramon Juste, animalien osasunean aditua, duela gutxi aintzatetsi dituzte nazioartean beren bikaintasun zientifikoagatik, Stanfordeko Unibertsitateak (Kalifornia) egin duen munduko zientzialari garrantzitsuenen zerrendan sartuta (Ranking of the World Scientists: World ‘s Top 2 Scientists). Munduko ikertzaile aipatuenek osatzen dute zerrenda hau, eta osatzen dutenentzat izugarrizko aintzatespena da. Izan ere, une honetan, ranking hau nazioarteko erreferentzia zientifikoko dokumenturik ospetsuena da zientzialariek egindako lanaren eragina ezagutzeko.

Garbisu doktoreak, gaur egun NEIKERreko zuzendari zientifikoa denak, aurrerapen garrantzitsuak egin ditu lurzoruetan bizi diren mikroorganismoen ezagutzan, bereziki nekazaritza-lurzoruetan eta lurzoru kutsatuetan, eta Euskal Autonomia Erkidegoan Lurzoruen Ekologia Mikrobianoa garatzen lagundu du, aitzindari gisa. Era berean, ezagutza teoriko eta praktiko garrantzitsuak eman ditu lurzoru degradatuak berreskuratzeari dagokionez. Gaur egun, ikerketaren zati handi bat ingurumenean antibiotikoekiko erresistentziak barreiatzeko eta larrialdietarako arriskuari buruzkoa da.

Bestalde, Ramon Juste doktoreak, NEIKERreko Animalien Osasun Saileko ikertzaileak, animalien osasunaren inguruan garatu du bere jarduera zientifikoa. Ekarpen zientifiko nagusiak mikobakteriosiak aztertzean oinarritzen dira, paratuberkulosia kontrolatzeko eraginkortasun epidemiologiko eta ekonomikoaren lehen eredu matematikoa garatuta eta txertaketaren babes espezifikoa eta ez-espezifikoa frogatuta. Gaur egun, ildo horri jarraitzea da bere interesik handiena, hanturazko gaixotasun geldoen sortzetiko immunitate-mekanismo komuna eta immunoterapia aktiboaren bidezko kontrolerako aplikazioa azalduz.

Aintzatespen horrek, era berean, NEIKERren bikaintasun zientifikoa islatzen du, bereziki merezimenduzkoa baita NEIKERren ikertzaile-kopuru txikia kontuan hartzen badugu, Stanfordeko rankingean dauden beste zentro askoren aldean, eta NEIKERrek bere ikerketa-lana euskal lehen sektoreari egindako transferentziarekin eta zerbitzuarekin partekatzen duelako, balio erantsia emateko eta lehiakortasuna hobetzeko.