Europako Batzordeak NEIKERek giza baliabideetan duen estrategia aitortu du

• Europako erakundeak “HR Excellence in Research” logoa eman dio zentroari, ikerketa lanerako ingurune estimulagarria eta mesedegarria sortu eta babesten duelako
• Ziurtagiria HRS4R estrategiaren parte da (Human Resources Strategy for Researchers), hau da, Europako Batzordeak unibertsitateei eta ikerketa erakundeei laguntzeko martxan jarritako tresnaren parte
• Zigilua lortzeak agerian uzten du NEIKERek ikertzaileen garapenarekin duen konpromisoa

 Basque Research and Technology Allianceko (BRTA) kide den NEIKER zentro teknologikoko lantalde batek 2019az geroztik ikertzaileentzat definitu zuen Giza Baliabideen Ekintza plana aitortu berri du Europako Batzordeak, “HR Excellence in Research” logoaren bidez. Ziurtagiriaren bidez, Europako Erkidegoko erakundeak ikerketa lanaren aldeko ingurune estimulatzailea sortzen eta babesten duten unibertsitateak eta erakundeak identifikatzen ditu.

“Logoaren erabilera modu egituratuan eta ondo definitutako Ekintza Plan batekin lan egiten hasteko ahaleginaren aitortza da, gure enpresaren barruan giza baliabideen politikak hobetzeko”, azpimarratu du Eva Ugarte NEIKEReko Giza Baliabideetako zuzendariak.

Zehazki, Ekintza Plana 2019ko abenduan lanean hasi zen ad hoc sortutako lantalde batek egin du, eta 5 urterako hainbat ekintza aurreikusten ditu.

Europako erakundeak logoa emateak, halaber, NEIKERen konpromisoa erakusten du Giza Baliabideen inguruan Europa mailan dagoen estrategia bateatu bati atxikitzeko, zeinak Europako Batzordeak onartutako bi dokumentu hartzen baititu erreferentziatzat: Ikertzailearen Europako Gutuna eta Ikertzaileak Kontratatzeko Jokabide Kodea. Alde batetik, Gutunak ikertzaileen eta haien enplegatzaileen funtzioak, erantzukizunak eta eskubideak deskribatzen ditu; eta, bestetik, Kodeak kontratazioa hobetzea du helburu, hautaketa prozedurak justuagoak eta gardenagoak izan daitezen.

“Ikertzailearen meritua, argitalpenen kopuruagatik ez ezik, ebaluatzeko beste irizpide multzo handiago batekin ere neurtu behar da, horien artean egonik hezkuntza eta irakaskuntza, ikuskapena, talde lana, ezagutzaren transferentzia, kudeaketa eta sentsibilizazio publikoko jarduerak”, gaineratu du Ugartek.

Gainera, NEIKEReko Giza Baliabideen estrategia, ikertzaileetan oso zentratuta dagoena, bat dator Zientzia eta Teknologiaren Euskal Sareak sustatzen duenarekin; horrek ikerketara zuzendutako baliabide guztiak hartzen ditu kontuan, eta zentro teknologikoa lantzen ari den Plan Estrategiko berrian jasoko dira.

Zer esan nahi du HR Excellence in Research logoa lortzeak?

“HR Excellence in Research” Ikerketako Giza Baliabideen Bikaintasunaren logoaren bitartez, Europako Batzordeak aitortza publikoa eskaintzen die beren giza baliabideen politikak Ikertzailearen Europako Gutunean eta Ikertzaileak Kontratatzeko Jokabide Kodean definitutako printzipioekin bateratzen dituzten ikerketa erakundeei.

“HR Excellence in Research” logoa HRS4R estrategiaren parte da (Human Resources Strategy for Researchers), hau da, Europako Batzordeak unibertsitateei eta ikerketa erakundeei laguntzeko martxan jarritako tresnaren parte. Azken helburua da ikertzaileentzat erakargarria izango den Europako lan merkatua garatzen laguntzea.