• Hitzarmenak, hasieran, lau urteko iraupena izango du.
• Elkarrekin lan egingo dute ingurumen konpromisoetan aurrera egiteko, tresnak garatuz eta dagoen ezagutza zientifikoa aplikatuz.

NEIKERek, Nekazaritza Ikerketa eta Garapenerako Euskal Erakundeak, eta Ihobek, Eusko Jaurlaritzako Ingurumen Jarduketarako Sozietate Publikoak, lankidetza hitzarmena berritu dute, ingurumen jasangarritasuna indartzeko, ezagutza aplikatuz. NEIKERen zuzendari nagusi Olatz Unamunzaga Galarzak eta Ihobeko zuzendari nagusi Alexander Boto Bastegietak sinatu dute akordioa, eta egungo eta etorkizuneko ingurumen erronkei aurre egiteko ahaleginak batzearen garrantzia nabarmendu dute. Hitzarmenak lau urteko iraupena izango du hasieran, eta urteko plangintza zehatza izango du. NEIKER eta Ihobek historikoki egin dute lan elkarrekin, eta hitzarmen honetan CO₂ xurgapenari buruzko informazioa hobetuko da, neutraltasun klimatikorako beharrezkoa den heinean, baita nekazaritza sektorearen emisioen kalkuluari eta lurzoruaren erabilera aldaketei buruzkoa ere.

NEIKERen zuzendari nagusi Olatz Unamunzaga Galarzak adierazi duenez, berriz, “lankidetza honek ikerketa publiko erabilgarri eta aplikatuaren alde dugun konpromisoa indartzen du, ingurumen erronka handiei erantzuteko”. Bere iritziz, “Ihoberekin gaitasunak batzeak aukera ematen digu ezagutza eta tresnen garapenean aurrera egiteko, Euskadi jasangarriagoa, erresilienteagoa eta neutraltasun klimatikoko helburuekin lerrokatuagoa izan dadin laguntzeko”.

Ihobeko zuzendari nagusi Alexander Boto Bastegietak azpimarratu duenez, NEIKERekin sinatutako hitzarmena “adibide argia da administrazioen arteko lankidetza Euskadin trantsizio ekologikoa bizkortzeko funtsezko motor bihur daitekeela erakusteko”. Botoren arabera, “bokazio eraldatzailea duten erakunde publikoen arteko gaitasunak batzeak aukera ematen digu nekazaritza eta abeltzaintza bezalako sektore estrategikoetan ingurumen irizpideak integratzen aurrera egiteko, ezagutza erabilgarria, soluzio berritzaileak eta Euskadi jasangarriago eta erresilienteago bati laguntzen dioten tresna aplikagarriak sortuz”.